पुण्यतिथीनिमित्त ११ मार्च रोजी दादरच्या शिवाजी मंदिरात विशेष प्रयोगमुंबई: प्रतिनिधी गणेश तळेकर

'इथे ओशाळला मृत्यू' नाटकाद्वारे धर्मवीर संभाजी महाराजांना देणार मानवंदना

​पुण्यतिथीनिमित्त ११ मार्च रोजी दादरच्या शिवाजी मंदिरात विशेष प्रयोग

​मुंबई: प्रतिनिधी गणेश तळेकर 

स्वराज्यरक्षक धर्मवीर छत्रपती संभाजी महाराज यांच्या धगधगत्या शौर्यगाथेचा इतिहास 'इथे ओशाळला मृत्यू' या अजरामर नाटकाद्वारे पुन्हा एकदा रंगभूमीवर अवतरणार आहे. महाराजांच्या पुण्यस्मरण दिनाचे औचित्य साधून, ११ मार्च रोजी दुपारी ४:०० वाजता दादर येथील श्री शिवाजी मंदिर येथे या विशेष प्रयोगाचे आयोजन करण्यात आले आहे.

​प्राध्यापक वसंत कानेटकर यांच्या सिद्धहस्त लेखणीतून साकारलेली ही संहिता शिवगणेश प्रॉडक्शन्सच्या कलाकारांनी पुन्हा एकदा ताकदीने सादर केली आहे. औरंगजेबाविरुद्ध नऊ वर्षे दिलेला लढा आणि स्वराज्यासाठी केलेला सर्वोच्च त्याग असा अंगावर शहारे आणणारा प्रवास या नाटकातून मांडला जातो.

​दिग्गज कलाकारांचा संच:

या नाटकाचे दिग्दर्शन गणेश ठाकूर यांनी केले असून, त्यांनीच छत्रपती संभाजी महाराजांची आव्हानात्मक भूमिका साकारली आहे. महाराणी येसूबाईंच्या भूमिकेत डॉ. सोनल लेले यांनी आपल्या अभिनयाची चुणूक दाखवली आहे. तसेच कवी कलश व गणोजी शिर्के अशा दुहेरी भूमिकेत प्रा. मिलिंद कासार, प्रल्हाद निराजींच्या भूमिकेत प्रशांत नाईक, तर औरंगजेबाच्या भूमिकेत ॲड. कृष्णा देसाई पाहायला मिळतील. सोबतच मंदार जंगम, दीपक झोरे, लक्ष्मण मांजरेकर, अजिंक्य देसाई आणि पत्रकार संदेश देसाई यांच्याही महत्त्वाच्या भूमिका आहेत.

​आयोजकांचे आवाहन:

"धर्मवीर संभाजी महाराजांचे बलिदान युवा पिढीसाठी सदैव प्रेरणादायी आहे. हा इतिहास प्रत्येकाच्या मनात जागृत ठेवणे हे आपले कर्तव्य आहे," असे मत शिवशंभू विचारमंचचे कोकण प्रांत संयोजक श्री. अभय जगताप व मुक्ताई फाऊंडेशनचे श्री. लव क्षीरसागर यांनी व्यक्त केले आहे.

​छत्रपती संभाजी महाराजांच्या पवित्र स्मृतींना उजाळा देण्यासाठी आणि त्यांना त्रिवार मुजरा करण्यासाठी रसिक प्रेक्षकांनी या प्रयोगाला मोठ्या संख्येने उपस्थित राहावे, असे आवाहन आयोजकांतर्फे करण्यात आले आहे.

​थोडक्यात माहिती:

• ​नाटक: इथे ओशाळला मृत्यू
• ​दिनांक: ११ मार्च (सोमवार)
• ​वेळ: दुपारी ठीक ४:०० वाजता
• ​स्थळ: श्री शिवाजी मंदिर, दादर, मुंबई.